अक्षररेखा डटकम
बर्दिया, २८ वैशाख
बाँसगढी नगरपालिकाले नगरबासीलाई भूमि प्रशासनसम्बन्धी सेवा नगरपालिकाबाटै प्रदान गर्ने भएको छ । नागरिकको सम्पत्ति सुरक्षा, सरल सेवा प्रवाह र पारदर्शितालाई प्राथमिकता दिँदै आवश्यक प्रशासनिक तथा प्राविधिक तयारी अन्तिम चरणमा पुगेको बाँसगढी नगरपालिकाले जनाएको छ ।
बाँसगढी नगरपालिकाका प्रमुख खड्कबहादुर खड्काले अब छिट्टै थप योजनासहित जनतामाझ सशक्त सेवाका साथ उपस्थित हुने प्रतिबद्धता जनाए ।
‘सेवा प्रवाहसँगै नगरबासीले अब भूमि प्रशासनसम्बन्धी स–सानादेखि ठूला कामका लागि गुलरिया धाउनुपर्ने बाध्यता हट्नेछ,’ नगर प्रमुख खड्काले भने । भूमि प्रशासन सेवामा नगरबासीको पहुँच सुनिश्चित गर्ने प्रतिबद्धताका साथ सेवा सुरु गर्न लागिएको नगर प्रमुख खड्काको भनाइ छ ।
भूमि प्रशासनसम्बन्धी सेवा संघीय सरकारअन्तर्गत मालपोत तथा नापी कार्यालयबाट प्रवाह हुँदै आएको थियो । यो सेवालाई सरल, गुणस्तरीय र स्थानीयबासीको सहज पहुँचमा पु¥याउनका लागि स्थानीय तहबाटै सेवा प्रवाह गर्ने नीति सरकारले लिएको छ ।
सोही नीतिअन्तर्गत गत वैशाख १० गते भूमि व्यवस्था, सहकारी तथा गरिबी निवारण मन्त्रालयले भूमि प्रशासनसम्बन्धी सेवा प्रवाह गर्न इच्छुक पालिकाहरूलाई मन्त्रालयमा सम्पर्क गर्न सार्वजनिक सूचना जारी गरेको थियो । सूचना जारी भएसँगै बाँसगढीलगायत देशभरिका २ सयभन्दा बढी पालिकाहरूले मन्त्रालयलाई पत्राचार गरेका थिए ।
गत वैशाख १६ गते मन्त्रालयलाई पत्राचार गर्दै बाँसगढी नगरपालिकाले पनि सो सेवा प्रवाह गर्न आफूहरू इच्छुक रहेको पत्र पठाएको थियो । नगरपालिकाले पठाएको पत्रमा बाँसगढी नगरपालिका आवश्यक पूर्वाधार र जनशक्ति व्यवस्थापन गरी उक्त सेवा सञ्चालन गर्न इच्छुक रहेको जनाइएको छ । पत्रमा स्थानीय सरकारले आवश्यक जनशक्तिसहित व्यवस्थापन गर्नुपर्ने भएकाले मालपोत र नापीबाट प्राप्त हुने लाभकर र रजिस्ट्रेसन शुल्क सतप्रतिशत स्थानीय सरकारकै रहने गरी कानुनी व्यवस्थासहित हस्तान्तरण गर्ने सुनिश्चितता गर्नसमेत अनुरोध गरिएको छ ।
नगरपालिकाको पत्रको जवाफमा मन्त्रालयले पुनः वैशाख १७ गते प्रतिबद्धता पत्र पठाएको छ । जसमा सो सेवा प्रवाहका लागि नगरपालिकाले देखाएको सक्रियता र प्रतिबद्धताका लागि आभार प्रकट गर्दै थप कार्ययोजनासहित सम्पर्कमा रहने प्रतिबद्धता जनाइएको छ ।
चरणबद्ध रूपमा भूमि प्रशासनसम्बन्धी सेवा स्थानीय पालिकाहरूलाई हस्तान्तरण गर्दै जाने उद्देश्यका साथ पहिलो चरणमा ३५ वटा पालिका छनोट गरिएको भूमि व्यवस्था, सहकारी तथा गरिबी निवारण मन्त्रालयले जनाएको छ । पालिकाहरूको इच्छा, तत्परता र क्षमताका आधारमा सेवा हस्तान्तरण गरिने मन्त्रालयका सूचना अधिकारी राजेन्द्रप्रसाद गौतमले जानकारी दिए । ‘पालिकाहरू इच्छा गरेर मात्रै पनि भएन,’ सूचना अधिकारी गौतमले भने, ‘सेवा प्रवाहका लागि आवश्यक पूर्वाधार, प्राविधिक तथा जनशक्ति व्यवस्थापन पनि गर्न सक्नुप¥यो ।’
पालिकाबाटै भूमि प्रशासनसम्बन्धी सेवा प्रवाह हुने भएपछि नगरबासीलाई सहज हुने भएको छ । आफ्नै पालिकाबाट भूमिसम्बन्धी सम्पूर्ण काम हुने भएपछि बाँसगढी नगरपालिका–५ का कृष्ण बाँस्तोलाले खुसी व्यक्त गरे । ‘जग्गासम्बन्धी सानो कामका लागि पनि गुलरिया धाउनुपर्ने बाध्यता थियो, फेरि सहज रूपमा सेवा पाउन पनि गाह्रो,’ उनले भने, ‘नगरपालिकाबाटै सो सेवा लिन पाउँदा स्थानीयबासीलाई निकै सहज हुनेछ ।’
