बाँके २७ | ऐतिहासिक तथा सांस्कृति महत्व बोकेको हरिबोधिनी एकादशी रात्री मेला आज बैजनाथको लालपुरमा लाग्दै छ ।
तिहार पछिको एकादशीका दिन रात्रीकालिन यो मेला परम्परागत रुपमा बर्षैदेखि लाग्दै आएको छ । मेलामा परम्परागत सांस्कृतिक तथा मौलिक नृत्य, झाँकीहरु, मनोरञ्जनका रमाइला खेलहरु, व्यापारीक स्टलहरु रहने आयोजक तथा व्यवस्थापनको जिम्मा लिएको न्यू जर्नी युवा क्लबका सचिव सुमन विश्वकर्माले बताउनु भयो ।
तुलसी विवाहको दिन एकादशी पर्वको अवसरमा वर्षैदेखि लाग्दै गरेको यो मेला अघिल्ला वर्षहरुमा स्वतस्फुर्त रुपमा लाग्दै गरेपनि पछिल्ला बर्षहरुमा भने व्यवस्थित, सभ्य र भब्य रुपमा लाग्दै आएको न्यू जर्नी युवा क्लबका कार्यवाहक अध्यक्ष दुर्गा बहादुर वली (श्याम) ले बताउनु भएको छ ।
मेला व्यवस्थापनका लागि भक्त बहादुर बोहराको संयोजकत्वमा मुल आयोजक समिति रहेको र मेला व्यवस्थापनका लागि जिल्ला प्रशासन कार्यालय, प्रहरी कार्यालय, बैजनाथ गाउँपालिकाको कार्यालय, ६ नं. वडा कार्यालय तथा स्थानीय बुद्धिजीवि, राजनीतिक दल, समाजसेवी लगायत सबै पक्षसँग समन्वय गरी थप व्यवस्थित गर्ने प्रयत्न गरिएको आयोजक क्लबका अध्यक्षले जानकारी दिनुभएको छ ।
